Christene is op die voorste linies van geestelike oorlog; halwe waarhede, subtiele kompromieë en onbeskroomde dwaling dreig om die kerk te korrupteer. In Suid-Afrika sien ons eerstehands hoe die kerk lou word, aan die wêreld gelykvormig word, die gesag van die Skrif verwerp en haar Eerste Liefde laat vaar. God se opdrag is duidelik: "hou vas!" Hou vas aan die Woord (1 Korintiërs 15:2); hou vas aan die hoop wat voorlê (Hebreërs 6:18); hou vas aan wat ons het (Openbaring 2:25)! Die doel van hierdie konferensie is om Christene, kerkleiers en predikante in Suid-Afrika aan te moedig om vas te hou aan die Woord van die Lewe sodat hulle as ligte in die wêreld kan skyn (Filippense 2:16), en dat niemand hulle oorwinnaarskrans mag wegneem nie ( Openbaring 3:11).